就快出發去旅行？大部分人出發去旅行或者出trip之前，都會做好準備工夫，包括比較機票或者酒店既價錢。宜家網上面咁多網站，可以令到你格價更加容易。但千祈唔好買完機票或者book左酒店就以為做足準備！記得要比較各種旅遊保險，唔好旅行社叫你買咩就買咩！ 以下係7樣你買旅遊保險時，需要考慮既野：
1. 取消旅程
買旅遊保既其中一個好處係，萬一旅程要取消，都可以得到保障。因為你永遠唔會知道會唔會因為病左而要取消旅程，或者touchwood有家人過世，而令你唔可以成行。比較平既保險多數唔會包取消旅程，但承保取消旅程可以話係買保險最有用既保障。
2. 行程提早結束
另一個買旅遊保既原因係，如果行程提早結束，都有得賠。萬一你病左或者整親，甚至旅行目的地有罷工、暴動或者騷亂，令到你要提早返香港，都可以claim得返機票錢。
3. 醫療費用
如果旅行途中不幸要入醫院，有冇諗過係你咪負擔得起呢筆開支？買旅遊保險嗰陣，最好揀一個承保醫療費用既plan，雖然未必包晒所有開支；但如果保險唔包的話，你分分鐘會因為過萬蚊既醫療費用而十分頭痕！另外，要記住任何買保險前「已存在之傷病」係唔包架。如果你係長期病患者，最好問清楚保險公司，有咩plan係承保旅行途中接受「已存在之傷病」既醫療費用。
4. 運動保障
去旅行當然係想玩得開心啲，但呢啲活動正正可能係不受保項目！如果你打算旅行時做任何運動，例如浮潛，就要同保險經紀講清楚。亦都要留意，萬一你因為做運動整親，可以claim得返幾多錢。
5. 親屬探望開支
如果你係一個人去旅行，又不幸要喺當地留醫既話，最好當然係有家人飛過去照顧你。如果你係經常要去外地出Trip，或者打算一個人去旅行既話，最好選擇一份有親屬探望賠償既旅遊保。
6. 不受保項目
買任何保單前一定要睇清楚細則，了解有咩係不受保。最常見既不受保項目包括戰爭同埋「已存在之傷病」。除此之外，任何同懷孕有關既醫療支出都好大機會係不受保項目！
7. 保費
最理想既旅遊保險當然係以合理既保費，承保到你想要既範圍。不過，你想要越多承保範圍的話，保費就會越貴。所以，你應該比較一下唔同保險公司提供既計劃，咁就可以搵到最啱你既旅遊保。MoneyHero幫你搜羅左不同旅遊保險既資料同報價，令你可以更有效率咁比較唔同保險計劃。
—–
旅遊保險可以喺經濟上保障到你，所以如果你就快去旅行既話，買份旅遊保險係明智既選擇。假如你可以針對承保範圍，作出精明既決定，亦都可以幫你慳返唔少錢。 假如你冇咩行李，覺得唔見左行李或者比人偷左行李，都唔會引致好大損失，咁就唔需要承保行李，可以慳返啲保費。
不過要記得，最平既野未必最啱自己。所以最緊要知道自己需要啲咩，咁至可以購買適合既旅遊保險！
資料來源:
Moneyhero
