【東方日報專訊】自駕遊深受港人歡迎，皆因更能掌握旅遊行程及時間，無奈間中會發生交通意外個案。國際專業保險諮詢協會會長羅少雄日前出席活動時話，外遊租車時最好買齊保險及避免於落後地方自駕遊。佢話單靠旅遊保險唔足夠，因為只係保到個人，而租車時通常只要求租用者為汽車投保，但唔包車上人員安全及第三者保險，所以要額外購買保險。
卓妮日前在香港中華出入口商會一個酒會上遇到羅少雄，佢話喺落後地方租車一般質素參差，而道路及規管都較多問題。如果真係要自駕遊，佢建議選擇日本、歐美、澳洲等地，駕車相對安全，而租車時選擇大公司，通常都會叫你買齊保險，咁就穩陣得多喇，另外亦要留意保額係咪足夠。
免言語不通 許華傑寧搭車
當日出席酒會嘅仲有中華出入口商會會長張學修、副會長陳勁、副秘書長許華傑等。
不時穿梭中港兩地嘅許華傑話，返內地經常會自駕遊，起碼路牌識睇，亦易於溝通，但如果去旅行尤其係啲言語不通嘅地方，就唔會自駕遊喇，寧願搭車仲方便啲。中華廠商聯合會副會長史立德都話好少自駕遊，只係多年前曾試過由德國駕車到荷蘭。
至於新加入做中華出入口商會會員嘅新華旅遊董事總經理楊章桂芝就話，佢曾於澳洲住咗十幾年，日日揸車接送女兒返放學，已經揸到唔想揸，加上喺外地駕車往往要分外留神，根本冇時間及閒暇欣賞四周風景，旅遊梗係想多啲欣賞沿路景色啦！
卓妮